ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានធ្វើដំណើរមកដល់រាជធានីភ្នំពេញវិញហើយនៅល្ងាចថ្ងៃទី១៣ ខែកុម្ភៈ ឆ្នាំ២០២២នេះ បន្ទាប់ពីចូលរួមកិច្ចធ្វើជាសហប្រធាននៃប្រជុំកំពូលសន្ដិភាពពិភពលោក និងទទួលមេដាយសន្ដិភាពស៊ុនហាក់ឆ្នាំ២០២២ នៅទីក្រុងសេអ៊ូល សាធារណរដ្ឋកូរ៉េ។

យន្តហោះដឹកសម្ដេចតេជោ ហ៊ុន សែន បានចុះចតនៅព្រលានយន្តហោះអន្តរជាតិភ្នំពេញនៅវេលាម៉ោងប្រមាណ៨ និង១៥នាទីល្ងាចនេះ។

សម្ដេចតេជោ ហ៊ុន សែន បានធ្វើដំណើរចាកចេញពីប្រទេសកម្ពុជាទៅចូលរូមកិច្ចប្រជុំកំពូលសន្ដិភាពពិភពលោកនៅថ្ងៃទី១០ ខែកុម្ភៈ កន្លងទៅនៅ ទីក្រុងសេអ៊ូល សាធារណរដ្ឋកូរ៉េ ដែលក្រៅពីធ្វើជាសហប្រធាននៃកិច្ចប្រជុំកំពូលសន្ដិភាពពិភពលោក និងទទួលមេដាយសន្ដិភាពស៊ុនហាក់ហើយ សម្ដេចតេជោក៏បានជួបពិភាក្សាការងារជាមួយប្រធានាធិបតីកូរ៉េលោក ម៉ូន ចេអ៊ិន និងប្រធានសភានៃសាធារណរដ្ឋកូរ៉េលោក Park Byeong-Seung និងមេដឹកនាំ អតីតមេដឹកនេះកំពូលៗមួយចំនួនទៀតផងដែរ។

ដំណើរទស្សនកិច្ចនេះត្រូវបានក្រសួងការបរទេសកម្ពុជាចាត់ទុកថាជាជោគជ័យសម្រាប់ជាតិមួយដោយថាមិនត្រឹមតែបានជួយលើកតម្អើងមុខមាត់ជាតិប៉ុណ្ណោះទេ តែថែមទាំងបង្កើនចំណងទំនាក់ទំនងកម្ពុជា-កូរ៉េឱ្យកាន់តែមាំទាំថែមទៀត៕